在香港討論區查看更多
2015 日本北九州7天之旅 - 福岡, 熊本, 由布院 (已完成)
+286
183.4K
224
33

原帖由 alal8888 於 2015-3-19 03:10 PM 發表 0




Thank you!
如果咁嘅行程順路嗎? 我見JR 有車到,(福岡 /長崎 / 原爆紀念館 / 長崎企鵝水族館/ 湯布院 )

地理上其實一定唔順路.

因為長崎係九州西面, 而湯布院就係東面.

坐JR要先番鳥栖轉車。車程至少3個鐘以上。
發短訊息 引用回覆
ching 如自駕以下行程須路MA?
DAY1博多
      2博多>動物園>湯布院
      3湯布院>別府>阿蘇
      4阿蘇>熊本>博多
      5博多
發短訊息 引用回覆
13 Feb 2015 - Day 6 (上) 博多 > 門司港 > Marinoa City Fukuoka Outlet > 天神蟹通 (宿: The B Hakata)

經過尋日一輪既 Shopping, 今日輕鬆一下, 到福岡近郊 - 門司港逛一逛咁.

因為本身無買任何既 JR Pass, 所以去門司港最抵既方法就係買 "門司港4枚卷".

4枚卷姐係你會有2張由博多去門司港既飛,2張由門司港番博多既飛。

當中除左新幹線外,任何列車都可以坐。(包括特急同普通車)

而最正路波既做法就係先由博多坐特急去小倉,再由小倉坐普通車去門司港。
車程係1小時8分鐘。

講講點買"門司港4枚卷"先,首先去博多JR站搵一部售票機
禁左邊第三個,紅色果個制。



之後禁左邊第一個,"2枚。4枚。10杖....."



之後禁左邊第一個,"小倉,門司港....."



之後揀4枚,你一個人去既話就揀2枚



之後禁左邊第二個,"博多-門司港....."



最後當然就係俾錢,5760日元2位。



之前已經上日本 Yahoo 既 JR 網頁搵定要坐既班次。
先坐 特急音速號 去小倉,再坐 鹿兒島本線 JR 去門司港。




去到搵番2號月台,乖乖等車就可以。



一見全藍色既車身就知係 883 Sonic 號,由第4卡打後先係自由席
我地買既門司港4枚卷只可以坐自由席, 要小心唔好坐錯.






車身入面既裝置好古舊, 樣樣都好似古董咁.
同外面藍色既現代化車身完全兩回事.




木地板上面仲要刻埋火車既資料, 好鬼講究.



10點07分準時到達小倉, 之後過對面月台轉車.



鹿兒島本線 JR 就即係最普通既 JR火車.
今日係星期五, 遊客唔多.
係香港, 呢種車箱既寧靜係一種奢侈.



坐左15分鐘就到門司港.
記住係坐到門!司!港!.

因為有一個站叫"門司", 同"門司港"爭一個字, 有機會搞錯.



出閘前見到呢個0哩既牌.

大家都可能估到, 0哩其實就代表呢度係九州最早有鐵路既地方.
可想而知, 門司港曾經對九州黎講係幾咁重要.

不過其實呢個牌係高仿, 姐係好似深圳華強賣果D高仿 iPhone咁.
真真正正既0哩牌放左係附近既九州鐵道紀念館入面.



簡單講講今日門司港既行程.

先坐潮風號火車到總站, 再經海底行人隧道由九州行到本州.
再坐巴士到唐戶市場食午飯, 再坐番觀光船到門司港 JR站番歸.
Perfect 池. 完美到諗起都會嘴角向上笑.

點知...一離開JR站, 黎到潮風號既售票處, 就知奶野.
落左閘, 上面個牌寫住 運!行!日! 3月15......XXXXXX

今日係2月13日...



唔打緊, 辦法總比困難多. 見到側門辦公室有人係入面.
就敲門入去, 用簡單英文問一問入面既職員. Tunnel. Tunnel.

好彩職員都明白我意思, 話俾我知而家無火車搭.
但有2個方法去隧道入口. 一係去對面坐74號巴士, 需時15分鐘.
一係就行過去, 需時40分鐘.

咁一聽40分鐘都好似行幾耐下, 就選擇坐巴士.
不過班次真係好疏下, 一粒鐘先一班.

去到巴士站, 查到下一班車要半個鐘先到. 就周圍行下先.

向住海邊行, 好快就見到呢條關門大橋.
呢條橋係唯一連接九州同本州之間既車路. 所以非常重要.

簡單D講, 如果無左呢條橋, 所有車都唔可以由九州渣到去本州.





近睇雖然無香港既青馬大橋咁靚. 但配合藍天白雲. 加分!



周圍逛一逛之後, 就快快步番去巴士站等巴士, 如果走左一班車再等既話就好大鑊.

之後巴士準時埋站, 咁我見到74號就上車.
架巴士轉左幾個彎之後, 我就發現有D唔對路.
點解係向住橋既反方向行既.

睇番地圖, 個隧道入口係係橋底架.

之後襯巴士停車, 我就即刻問一問司機, 拎住幅地圖, 用手指住個隧道入口.
跟住司機就指住對面條行車線. 咁我當然估到咩事.

74號!無錯. 但方向錯左呢.
好彩既係只係坐左2個站, 行番轉頭都唔算好遠.

咁話晒都係自己大頭蝦, 無理由坐霸王車.
當我同太座正想俾錢之際, 司機好有型咁用手禁住個錢箱.

佢知道我地搭錯車, 所以都唔收我地車費.
咁大個仔第一次搭錯車係咁開心. 又一次見證到日本人既友善.
同司機講左幾聲 Thanks you 之後就落車. 再研究下點算.

諗諗下, 如果等下一架巴士, 都唔知要等幾耐.
自我安慰一下, 行路都係40分鐘姐. 未當散步囉.

加上行路一定唔會錯. 因為基本上成個門司港都望到關門大橋.
只要向住橋底方向行就可以了.

沿住海邊行其實都幾舒服
如果退休之後可以住係呢間屋就一流.



再近D睇, 橋身有部份俾帆布圍住左, 估計應該進行緊維修.



終於見到終點. 係咁好天氣之下, 其實感覺唔算行左好耐.



使用行人隧道, 行人免費, 單車同小型電單車收 20日元.



搭 Lift 落左 55米左右, 姐係大約18層樓...唔太老黎. 就到左行人隧道.

呢條隧道全長780米. 唔知點解好多人係度跑步.
如果外面落雨都可以理解. 但出面風和日麗, 點解要係隧道跑呢?



係起點可以拎一張紀念證書, 先吸半個印. 到隧道另一邊既時候就可以吸埋另外半個印.



暫時要離開九州一陣.



下關市最出名既就係河豚. 所以都用埋佢做 Logo



邊行邊影下相咁,用左10分鐘就行完成條隧道。



吸埋另一個印先。



證書後面有一個好清楚既地圖。

一開始落 JR 果度係 A點 - 門司港駅
之後行左去 B點 - 關門大橋隧道入口
經隧道行左去 C點

跟住我既行程就會坐巴士去 D點 - 唐戶市場
再坐觀光船由 D點番番去 A點.



終於上番水。個入口同對面岸果個差唔多。
發短訊息 引用回覆
13 Feb 2015 - Day 6 (下) 博多 > 門司港 > Marinoa City Fukuoka Outlet > 天神蟹通 (宿: The B Hakata)

今次老虎蟹都分清楚方向, 過對面行車線坐巴士,記住係對面. (巴士 180 日元,到唐戶市場落車)

一落車向海邊行就會見到唐戶市場。



市場入口會見到好大個河豚擺設,我稱佢為"河豚塚", 一日都唔知有幾多條河豚死係呢度。



可能今日係平日既關係,只係得幾間鋪頭有開門。





雖然開門既鋪唔多,但刺身同壽司既種類就五花八門。
價錢都非常合理。



我要左一個右上角既海膽飯。成碗飯海膽仲多過飯。都只係1000日元。



跟手又夾下D件裝壽司。中間果件吞拿魚D紋靚到好似假既咁。



揀好晒食物之後就上2樓搵位,坐低慢慢食,完全自助型式。

如果鐘意同大自然玩遊戲既話,仲可以行出海邊搵個位慢慢食。



食飽飽之後,就行去碼頭,準備坐船番 JR站。(船票400日元)



5分鐘左右就到對面岸.



呢個就係門司港呢面既碼頭。



見時間尚早,就周圍行多陣。

賣下汽車廣告先。



左手邊係 Blue Wing 門司索道橋,橋身可以打開,一日會開合6次。

開橋時間:10:00・11:00・13:00 14:00・15:00・16:00
閉橋時間:10:20・11:20・13:20 14:20・15:20・16:20

右手邊好高果棟大樓叫 Retro Highmart, 31樓有一個展望室同 Cafe.



呢棟係北九州市立國際友好紀念圖書館. 好西洋 Feel, 另我諗起北海道既小樽都有好多呢種建築。



因為過去台灣運到日本既香蕉都係經門司港,再外銷到日本各地。所以見到2個香蕉人係合理既。



門司港真係一個好舒服,好優閒既地方。去福岡旅行的話,絕對要抽半日時間黎行下。



行到咁上下, 就搭車番博多, 向下一站 Marinoa City Outlet 出發.

一去到 JR 站, 就見到有車, 見到寫住"博多", 就唔理三七二十一上左去先.



上到車再用電話上網查一查, 睇下邊度可以轉特急.

呢個 Yahoo JR 網好有用, 推介 - http://transit.loco.yahoo.co.jp/

查到到折尾可以轉車.



如果唔轉車既話就要坐多15分鐘先番到博多.



呢架就係回程坐既 885 特急海鷗號, 白色既車身又係好易認.





番到博多就轉搭地鐵去姪浜 (300日元)
要坐10個站, 需時15分鐘左右.



去到姪浜站, 出"南口", 有一排巴士站
其中一個寫住去 Marinoa City Fukuoka (單程100日元)



平日半個鐘先有一班車. 見仲未有車, 就去車站隔離既商場行下.
有藥店, 有超市, 有 Cafe, 有麵包鋪......隨時行到過晒籠, 走左架巴士.



留意番呢架穿梭巴士其實同一般普通巴士無分別. 要認住 Marinoa City Outlet 既日文.
因為車身既側面只貼左 Outlet 既日文名. 要認清楚先好上.

坐15分鐘左右就到 Outlet 門口。



車站既另一面有一個好靚既教堂。





一般 Outlet 都有既摩天輪,呢度點小得。



由細到大睇咁多日劇,摩天輪係表白既熱門地點之一。



Marinoa City Outlet 賣既野無鳥栖 Outlet 咁高級。所以相對黎講都比較易執到平貨。
ABC Mart 入面既波鞋都幾抵。行完之後,我同太座都有收鑊。

如果要二擇其一,我會推介Marinoa City Outlet.

行到天黑,就直接由 Outlet 坐巴士去天神食晚飯 (370日元)



太座有令,慶祝生日想食長腳蟹,就上網搵左呢間叫"蟹通"既餐廳。
http://www.kanitsu.co.jp/index.html

點左右手邊呢個 7550 日元一位既套餐。



首先俾大家估一估呢舊咩黎,放心,唔係核突野。我開頭以為係山竹牛肉。
(最尾開估)



呢個套餐超多野食,超飽。

先有燒蟹腳,成個餐最好味係呢個蟹腳。



再黎蟹刺身,太座唔食生野,我食晒。



之後就黎天婦羅,個蟹腳天婦羅又係好好味。



跟手黎一個茶碗蒸蛋



之後重頭戲,蟹邊爐。



打完邊爐個蟹湯當然唔浪費, 加隻蛋, 加白飯.
就變左蟹粥. 超入味.



最後黎個飯後果收尾.



一個餐, 一杯生啤, 一杯烏龍茶, 埋單 15990 日元.
(最後開估, 果團黑色野係蟹膏黎. 可惜我同太座都唔識食膏)

食完咁飽就慢慢行番去博多既酒店. 15分鐘左右, 散步落下隔.

經過番尋晚食串燒既居酒屋. 係門口影張相俾大家參考下.


呢間鋪係 Yodobashi 隔離, JR 站出口, 好易搵.


今晚要進行最艱困既任務, 就係執喼.
我諗起一條 IQ 題, 點樣將一隻大苯象放入雪櫃呢???
發短訊息 引用回覆
Ching的遊記好正, 用詞又鬼馬生動, 支持!!



發短訊息 引用回覆
師兄, 係咪 3 個步驟將大象放入雪櫃吖?

咁又點用 4 個步驟將長頸鹿放入雪櫃呢?

師兄太太好溫柔, 相信好多師兄都希望有一位喺自己無記好火車運行日, 等巴士又等錯方向並且上埋車嘅情況下仍然唔發火嘅太太.

呢啲自由行嘅樂趣, 睇嚟唔係每位身邊人都識欣賞.
發短訊息 引用回覆
CHING~再次多謝你分享呀
我估下次去九州
會去門司港啦
真係唔錯
發短訊息 引用回覆
個遊記超正,描寫生動有趣,資料又詳細,一定比左好多心機寫



發短訊息 引用回覆
Ching 個遊記真係好正又生鬼,之前仲煩繄點plan 行徎,好彩見到呢個 post.我即做 copy cat.只改少許野



發短訊息 引用回覆

原帖由 tucuxi 於 2015-3-24 08:59 AM 發表 0
師兄, 係咪 3 個步驟將大象放入雪櫃吖?

咁又點用 4 個步驟將長頸鹿放入雪櫃呢?

師兄太太好溫柔, 相信好多師兄都希望有一位喺自己無記好火車運行日, 等巴士又等錯方向並且上埋車嘅情況下 ...

可能係門司港寧靜既環境替佢消左D戾氣
發短訊息 引用回覆

原帖由 DLYN 於 2015-3-24 10:17 PM 發表 0
Ching 個遊記真係好正又生鬼,之前仲煩繄點plan 行徎,好彩見到呢個 post.我即做 copy cat.只改少許野



0

希望可以幫到你計劃行程
發短訊息 引用回覆
原來門司港都幾吸引呢 …… relax

可以加埋落行程 ……

想問搭 JR 落熊本 ,

行李係跟座位果卡 、

定另有行李倉  ……

謝謝各方解答 ……



發短訊息 引用回覆
我去年係'門司'落錯車,要等多一個鐘坐下一班車。
發短訊息 引用回覆
好正, 可以跟住咁玩
發短訊息 引用回覆
謝謝分享



發短訊息 引用回覆