最近我被一件心事困擾住,左諗右諗下,決定上嚟傾訴,兼且希望尋求到各方網友嘅意見。
本人剩女一名,早已踏入中女之列,今年三十有五。由中二讀書時期開始拍拖,十幾年嚟,同過十幾個男人一齊,最短嘅只有個幾月,最長嘅行咗五年。响廿九歲嗰年,當時我嗰位男友向我求婚,因為當年未想嫁住,加上我之前曾有位ex迫我結婚嘅陰影籠罩下,我拒絕咗佢,之後佢開始步步進迫,拖拉半年,响佢迫到我有氣冇訂抖之下,我唯有同佢提出分手,等佢可以搵過第二個女人結婚生仔。我同呢位男友結束後,就決定之後嗰兩年,暫時唔再拍拖住,想試吓靜靜享受單身嗰種唔駛交代、自由自在嘅日子。
頭兩年單身日子,其實我覺得都ok,除咗响大時大節,會有怪怪同孤單嘅感覺外,其他都冇乜嘢。就响呢段時間,父母開始俾壓力我,想我結婚,我明白為人父母嘅心態,但係我當時都冇拍拖成兩年,貿貿然講咩結婚?如是者我開始被"轟炸"!因為佢地知我十幾歲開始明明一直都有拖友,反而去到三十歲後,進入人生應該要談婚論嫁階段時,先嚟學人回復單身,所以佢地就以為我專登玩嘢、搞對抗!於是我同自己講,既然係咁,我是但搵個男人嫁囉!冇幾耐,有個我識咗十幾年嘅朋友同我表白,到嗰刻先至發現,原來自己係做唔到「是但搵個男人嫁」㗎!我對佢,只有朋友感情,並冇情愛嘅感覺,所以最後都冇接受到佢!
父母"轟炸"完大概兩年之後,近年已經冇再提。忽然間,我覺得自己好不孝,好對佢地唔住!父母年紀漸大,仲要操心、擔心我嘅終身大事。諗到呢度,我先真真正正決定豁出去,但係當我驚覺,再環顧一吓身邊所有朋友,先發覺好多朋友,原來都先後响呢幾年結咗婚。未婚嘅,自己知道絕對係冇可能嘅。呢幾年,可能年紀大,加上工作困身,自己少咗出去應酬,朋友圈不知不覺已經縮窄咗好多。僅存嘅朋友,大部份都係識咗十年以上,某部份冇咁熟嘅朋友,以前佢地見我一直有拖友,呢五年反而冇,都誤以為我要求高!其實去到呢個年齡層,仲邊有咁多未婚男仕?坦白講,我之前的確係冇意識到,女人三十歲後個market,未婚男仕比例原來萎縮得咁緊要,自己都有啲悔不當初!所以決定將來要結婚嘅網友們,奉勸一句,大家真係要响三十歲前,搵到個穩定嘅另一半。
呢刻我知我要擴闊返自己個朋友圈子,但係有冇人可以俾到其他建議我?我有啲朋友叫我去參加興趣班,擴闊返個生活圈子,但因為我工作時間長,而且返足六日,限時限刻咁上興趣班,我恐怕真係無能為力!至於clubbing夜場嗰啲,好似just for fun咁!最後我可以諗到嘅,就只有婚姻介紹所,唔知有冇網友試過?有嘅,可唔可以分享一吓經歷?
我反對樓主所講係30歲前結婚,好多人都有呢種觀念,越早結婚就有更多選擇╱身邊朋友大部份已結婚我又結,造成香港離婚個案不斷上升,好似人有我有呢種心態。我覺得只要相方開心快樂╱生活充實,有冇張婚紙╱大龍鳳都一樣有美滿人生。
Facebook
LINE
WhatsApp

努力加油


