被朋友欺騙到廣西南寧(資本運作 自願連鎖經營 1040)
2K
4
都好大篇,做好心理準備
早前有個大學同學msn我問我近況如何?工作如何?剛剛我轉左工但不如意,佢就向我透露在大陸工作前景唔錯,而且係大陸都有d人脈,所以如果要幫忙可以揾佢。我果陣就諗係香港又好似發展麻麻,跟住我又真係好想返去大陸發展喎,過一排佢又揾我話剛剛係大陸返黎約出去食飯啦,飯局中只是輕輕略過我d問題,都幾含糊,唔太了解做咩,只知是做貿易中介。
再過多一個月,我就決定辭職,打算去大陸睇下有無得發展,就算無發展咪當去旅行咯,當然在之前一直都係msn有繼續聯絡。出發之前我都係唔知目的地係邊,因為佢同我講要周圍飛。出發當日到深圳同佢會合,終於係佢手中接過張去南寧既車票,當時完全唔知南寧係咩地方,只知係廣西,當時都幾興奮,又期待究竟公司點樣,學到d咩。
到達目的地,算係一個高尚住宅小區,環境唔錯,入到屋更有驚喜,原來有位同學都係度一齊做,咁就更加開心啦!大家自己人。
第一日到步雖然累,但都想睇睇公司點做。但點知坐車去d經濟開發區睇樓,睇發展成點,的確睇到周圍都係高樓大廈,住宅樓房,而且發展得好快,跟住又帶我去睇領事館區,的確幾特別,又去大型商場食飯,眼見消費都唔低,而且周街都寶馬,benz,總之好多歐洲車,不禁嘆句原來廣西真係咁好發展,之後再去埋會展中心,話每年東盟會展都係到搞,商機無限。行左成日返到住處,諗住上下網,點知同我講話無交錢上唔到,好無奈禁沖完涼訓教。
第二日,正式進入主題,7:30叫我起身,我以為正式做野啦,點知帶我周圍轉終於去到隔離幾棟既一個單位,入到去有個女仔好客氣既招待,向我介紹其實佢地每個人都係獨立既老闆,係叫做"自願連鎖經營"生意。我完全唔明,佢就一輪咀介紹,而且畫埋圖,話用RMB6萬9千8申購21份股份,當中要拎去交稅,同投資國家基建,經過五級三晉制,揾三個下線,下線再每人揾3個下線,如此類推,當累加到600份股份,就可升到最高級別,即佢地稱"老總"每個月有6—10萬既保底津貼,而當你下線三代都上最高級別,就要退出,最終可得1040萬,而且有所謂的吸左稅印既"出局証"又話因為每人最多只可申購21份同只可參與一次,所以絕對公平,公正,公開。講左一個鐘,我心諗係咪傳銷黎架,但又唔同我所認識既傳銷,總之好亂。跟住就帶我走,又去另一棟樓既單位,又係香港人,而且係大學畢業既男生,佢又好客氣咁招待我,問我到左幾日,去過d咩地方,了解左佢地既生意未。跟住又入正題同我講呢個生意同傳銷既分別,又話係咪政府暗地支持,講左幾點:用國有銀行過數,用國有電信公司既免費集團網(無上限),同埋當地土地變更(全部住宅,無公廠)等等...又講左一個鐘就返歸食飯,途中朋友都叫我既然來到,不防了解下佢地做緊d咩,仲話佢全家辭職過黎做,如果係壞事點會累屋企人丫,我就被留低左。食完飯三點半又要去某單位坐啦,今次又係香港中年男士招待我,又係向我講政府暗地支持,仲話好有意義,解決五大類人士(退伍軍人,下崗工人,畢業學生...)失業問題,將東部資金同人材帶到西部發展西部大開發,打造一班中產階級,解決貧富差距,陪養有膽識的現代化商人同民間財團等,跟住講左又一個鐘,問我覺得生意點有無咩問題。由於時間關係又要去另一單位,今次係一位內地教授,佢主要同我講政府暗中將政策放到廣西的手段,又話朋友欺騙你係用心良苦,又話好多負面報導係政府宏觀調控等,又講左一個鐘,又返去食飯,諗住返去上網查下,點知都係上唔到,又過一日。
第三日開始,又係好早起,今次去唔同小區,但講埋差不多既野,如是者,好幾日,每日好有規律咁去唔同背景既人既家去了解,又聽左關於行業既規條(經營管理二十條),又睇左好多佢地話係宏觀調控既圖同影片,又話某某幾個月都拿到幾十萬,又話在香港打死一世工都買唔到樓等,當中的確會有令人心動,令人振奮的話,差點打動我。但因為我無錢,所以睇左4,5日都無申購,佢地就叫我問人借,佢話佢地個個都係咁,等叫到屋企人來,自然會明白會幫你。
過左7日,即是最後一日,因為行業規定招待新人去了解只有7日,都不斷問我看懂了沒有,借到錢未,最後我話無,而且要同屋企人商量,所以離開左果個幾十萬人從事該行業既地方,而且比我知道原來佢地係刻意唔比我上網揾相關資料,同埋每去拜訪一人前,都會將我既情況預先講比佢地知,等佢地有所準備,對唔同類型既人講唔同既野誘導思想,激勵意志。
回想起就好似發左場千萬富翁夢咁,打咁多野都係想各位知道廣西仍然有好多香港人從事呢樣野,而且見過台灣,澳門既人從事,仲有想問下各位有無相同既遭遇呢?究竟我係放棄左一個令我富裕三代既機會,定逃離左一個累全家既陷阱呢?
發短訊息 引用回覆
Ching 你決定係正確的
發短訊息 引用回覆
根本就係傳銷𠱓錢,大陸好鬼多傳銷㗎。
樓主你走得到真係要還神



發短訊息 引用回覆
多謝分享。聽你講似是陷阱多,還是腳踏實地搵份工好過!



發短訊息 引用回覆
多謝各位提點,一開始咩都唔清楚,又唔了解內地,好勇咁上左去,而家諗起都幾恐怖
發短訊息 引用回覆